1 ശമുവേൽ 12:3 “ഞാൻ ഇതാ, ഇവിടെ നില്ക്കുന്നു: ഞാൻ ഒരുത്തൻ്റെ കാളയെ അപഹരിച്ചിട്ടുണ്ടോ? ഒരുത്തൻ്റെ കഴുതയെ അപഹരിച്ചിട്ടുണ്ടോ? ഞാൻ വല്ലവനെയും ചതിച്ചിട്ടുണ്ടോ? വല്ലവനെയും പീഡിപ്പിച്ചിട്ടുണ്ടോ? ഞാൻ വല്ലവൻ്റെയും കയ്യിൽനിന്നു കൈക്കൂലി വാങ്ങി എൻ്റെ കണ്ണു കുരുടാക്കീട്ടുണ്ടോ? ..എൻ്റെ നേരെ സാക്ഷീകരിപ്പിൻ; ഞാൻ അതു മടക്കിത്തരാം”
ദൈവത്തിൻ്റെ പുരോഹിതനായ ശമുവേൽ പ്രവാചകൻ തൻ്റെ വാർദ്ധക്യനാളുകളിൽ ഒരുദിവസം യിസ്രായേൽ ജനത്തിൻ്റെ മുമ്പാകെ നിന്നുകൊണ്ട് പ്രാഗൽഭ്യത്തോടെ പറഞ്ഞ വാക്കുകളാണ് ഇത്. ഈ ചോദ്യത്തിന് ജനം അവനോടു പറഞ്ഞ മറുപടി (വാക്യം 4 “അതിന്നു അവർ: നീ .. ചെയ്തിട്ടില്ല എന്നു പറഞ്ഞു”).
ജീവിതത്തിൽ സത്യസന്ധത (പരമാർത്ഥത) കൈമുതലായിരിക്കുന്നവർക്കു മാത്രമേ ഇതുപോലെ മറ്റുള്ളവരോട് സംസാരിക്കാൻ കഴിയുകയുള്ളൂ.
ചില ആളുകളുടെ പേരുകൾ ചരിത്രത്തിൽ എക്കാലവും ഓർമ്മിക്കപ്പെടുന്നത് അവരുടെ വലിയ കഴിവുകൾകൊണ്ടോ, ബുദ്ധിവൈഭവങ്ങൾകൊണ്ടോ ആകണമെന്നില്ല. തങ്ങളുടെ സത്യസന്ധതകൊണ്ട് ജനഹൃദയങ്ങളിൽ സ്ഥാനംപിടിച്ചവർ നിരവധിപേരുണ്ട്. അവരിൽ ഒരാളാണ് ഇവാൻ ഫെർണാണ്ടസ് എന്ന സ്പാനിഷ് കായികതാരം. 2012 ൽ നടന്ന ഒരു ഓട്ട മത്സരത്തിൽ അദ്ദേഹം രണ്ടാമനായി ഓടിക്കൊണ്ടിരിക്കുമ്പോൾ തൻ്റെ മുമ്പിൽ ഒന്നാമനായി ഓടിക്കൊണ്ടിരുന്ന കെനിയൻ താരം ആബേൽ മുടായി ഒരു വലിയ അബദ്ധം കാണിക്കുന്നതായി ശ്രദ്ധയിൽപെട്ടു. ഓട്ടത്തിൻ്റെ ഫിനിഷിങ്ങ് ലൈന് തൊട്ടുമുമ്പു വരച്ചിട്ടുള്ള ലൈൻ കണ്ട്, അത് ഫിനിഷിംങ്ങ് ലൈനാണ് എന്നു തെറ്റിദ്ധരിച്ച് ഓട്ടം അവസാനിപ്പിക്കാൻ തുടങ്ങിയ കെനിയൻ താരത്തോട്; ‘അതല്ല അതല്ല അടുത്ത ലൈൻ’ എന്ന് പുറകിൽ നിന്ന് ഉറക്കെ വിളിച്ചുപറഞ്ഞു. എന്നാൽ സ്പാനിഷ് ഭാഷയിൽ ഇവാൻ പറഞ്ഞത് ആബേലിന് മനസ്സിലായില്ല. കണ്ണുമിഷിച്ചുനിന്ന ആബേലിനെ പുറകിൽ ഓടിവന്ന ഇവാൻ മുമ്പോട്ടു തള്ളി ഫിനിഷിങ്ങ് ലൈനിൽ എത്തിച്ചു. ഈ മത്സരം കണ്ടുനിന്ന കായികപ്രേമികൾ അന്തംവിട്ടുപോയി.
കെനിയൻ താരത്തെ പിൻതള്ളി ഒന്നാമത് എത്തുന്നതിനു പകരം, അവനെ തള്ളി ഒന്നാമത് എത്തുവാൻ സഹായിച്ച ഇവാൻ ഫെർണാണ്ടസ് എന്ന കായികതാരം ലോകത്തിലെ ഏറ്റവും വലിയ വിഡ്ഢിയാണ് എന്ന് ജനം കരുതി. കാരണം ആ മത്സരത്തിൽ ഒന്നാമത് എത്തിയിരുന്നെങ്കിൽ ഇവാന് യൂറോപ്യൻ ചാമ്പ്യൻഷിപ്പുകൾക്കുള്ള സ്പാനിഷ് ടീമിൽ ഇടം ലഭിക്കുമായിരുന്നു.
രണ്ടാഴ്ചകൾക്കുശേഷം ഒരു മാധ്യമം ഇവാനെ ഇന്റർവ്യൂ ചെയ്യുമ്പോൾ എന്തുകൊണ്ടാണ് താൻ ആ കെനിയൻ താരത്തെ മറികടന്ന് ഒന്നാമത് എത്താതിരുന്നത് എന്നു ചോദിച്ചു. അതിന് ഇവാൻ ഫെർണാണ്ടസ് നൽകിയ മറുപടി ലോകം കേട്ടു. ആ കെനിയൻ താരത്തിൻ്റെ അറിവില്ലായ്മയെ മുതലെടുത്ത് ആ മത്സരത്തിൽ ഒന്നാമത് എത്തുവാൻ എന്റെ അഭിമാനം എന്നെ അനുവദിച്ചില്ല, ട്രാക്കിൽ അവനെ ഓടിതോൽപ്പിക്കാതെ അവസരം മുതലാക്കി ഞാൻ നേടുന്ന ജയം നീതിയുള്ള (യോഗ്യമായ) ജയമാണ് എന്ന് ഞാൻ കരുതുന്നില്ല. മാത്രമല്ല ഈ മത്സരം കണ്ടുകൊണ്ടിരിക്കുന്ന ഒരു അമ്മ എനിക്കുണ്ട്, കെനിയൻ താരത്തെ തള്ളിമാറ്റി ഒന്നാമനായി വിജയിച്ചുകൊണ്ട് വീട്ടിൽ ചെന്ന് എൻ്റെ അമ്മയുടെ മുഖത്തുനോക്കാനുള്ള ധൈര്യം എനിക്കില്ല. ഒന്നാം സ്ഥാനം നഷ്ടപ്പെടുത്തിയതിന് എല്ലാവരും എന്നെ കുറ്റപ്പെടുത്തിയപ്പോൾ, എൻ്റെ അമ്മ എന്നെ കെട്ടിപ്പിടിച്ചുകൊണ്ട് അഭിനന്ദിച്ചു, നീ ചെയ്തതാണ് ശരി എന്ന് എന്നോടു പറഞ്ഞു, എനിക്കതുമതി.
ഇവാൻ ഫെർണാണ്ടസിൻ്റെ വാക്കുകൾക്കു മുമ്പിൽ ലോകം തലകുനിച്ചു. അവൻ്റെ സത്യസന്ധതയെ ജനം വാഴ്ത്തി. ചരിത്രത്തിൻ്റെ താളുകളിൽ അതു മായാതെ കുറിക്കപ്പെട്ടു.
ശമുവേൽ പ്രവാചകനും ഒരു അമ്മ ഉണ്ടായിരുന്നു. ദൈവത്തോട് കരഞ്ഞുപ്രാർത്ഥിക്കുന്ന ആ അമ്മയുടെ പേര് ഹന്ന എന്നായിരുന്നു. അവൾ എത്രയോ നാളുകൾ പ്രാർത്ഥിച്ചതിൻ്റെ ഫലമായിട്ടാണ് ശമുവേൽ എന്ന പുത്രനെ ലഭിച്ചത്. അവനെ ഒരു നല്ല ബാലനായിട്ട് വളർത്തിയിട്ടായിരുന്നു അവൾ ബാലനെ ദൈവാലയത്തിൽ കൊണ്ടുവന്ന് ഏലി പുരോഹിതനെ ഏൽപ്പിച്ചത്. അമ്മ അവനെ ശീലിപ്പിച്ച ദൈവഭക്തിയും, സത്യസന്ധതയും, പരമാർത്ഥതയും വാർദ്ധക്യത്തിലും ശമുവേൽ കാത്തുസൂക്ഷിച്ചതുകൊണ്ടാണ് അവൻ യിസ്രായേൽ സഭയുടെ മുമ്പാകെ നിന്നുകൊണ്ട് ആ വാക്കുകൾ പറഞ്ഞത്. സമൂഹത്തിൽ തട്ടിപ്പും വെട്ടിപ്പും നടത്തി, കൈക്കൂലിയും കമ്മീഷനും വാങ്ങിച്ച് മറ്റുള്ളവരുടെ പ്രാക്കും ശാപവും വെറുപ്പും സമ്പാദിച്ചു ജീവിക്കുന്നവർക്ക് ഒരിക്കലും ശമുവേലിനെപ്പോലെ പറയാൻ കഴിയില്ല.
ഇന്ന് മക്കൾ വഴിതെറ്റിപ്പോകുന്നു എന്ന് വ്യാകുലപ്പെടുന്ന മാതാപിതാക്കളുടെ എണ്ണം കൂടിക്കൊണ്ടിരിക്കുകയാണല്ലോ. സ്കൂളുകളിൽപോലും മയക്കുമരുന്നുകൾക്ക് അടിമകളായി മാറുന്ന കുഞ്ഞുങ്ങളെക്കുറിച്ചുള്ള വാർത്തകൾ കാണുമ്പോൾ വല്ലാതെ സങ്കടം തോന്നുന്നുണ്ട്. നമ്മൾ അവർക്കുവേണ്ടി കൂടുതൽ ജാഗരിക്കണം, പ്രാർത്ഥിക്കണം, വചനം പഠിപ്പിക്കണം, ഉപദേശിക്കണം,.. അവരെ ദൈവഭയത്തിൽ വളർത്തണം.
ഹന്നയുടെ മകൻ വാർദ്ധക്യത്തിലും സത്യസന്ധനും ദൈവഭക്തനുമായിരുന്നതുപോലെ, നമ്മുടെ മക്കളും ആകും. ഹന്നയെപ്പോലെ പ്രാർത്ഥിച്ചാൽ മതി.
ദൈവം സഹായിക്കട്ടെ,
പ്രാർത്ഥനയോടെ,
ഭോപ്പാലിലെ വചനമാരിയിൽനിന്നും
ഷൈജു പാസ്റ്റർ (9424400654)
പ്രാർത്ഥനാകൈത്താങ്ങൽ ആവശ്യമുള്ളവർ വിളിക്കേണ്ട നമ്പർ: 07554297672, 7000477047, 9589741414
വചനമാരി WhatsApp ഗ്രൂപ്പിൽ അംഗമാകുവാൻ ഇവിടെ ക്ലിക്ക് ചെയ്യുക
