നമ്മെ കരംപിടിച്ച് നടത്തുന്ന ദൈവം

   ഉൽപ്പ. 15:5 “പിന്നെ അവൻ അവനെ പുറത്തു കൊണ്ടുചെന്നു: നീ ആകാശത്തേക്കു നോക്കുക; നക്ഷത്രങ്ങളെ എണ്ണുവാൻ കഴിയുമെങ്കിൽ എണ്ണുക എന്നു കല്പിച്ചു. നിൻ്റെ സന്തതി ഇങ്ങനെ ആകും എന്നും അവനോടു കല്പിച്ചു.”
       സർവ്വശക്തനായ ദൈവംതമ്പുരാൻ അബ്രാഹാമിനെ പുറത്തുകൊണ്ടുവന്ന് ആകാശത്തിലെ നക്ഷത്രങ്ങളെക്കാണിച്ച് വാഗ്ദത്തങ്ങൾ നൽകി അനുഗ്രഹിച്ചു. ദൈവത്തെ അറിയാതെ ജീവിച്ച സാഹചര്യത്തിൽനിന്ന്, വിഗ്രഹങ്ങളെ ഉണ്ടാക്കിയും അന്യദൈവങ്ങളെ സേവിച്ചുംവന്ന ഇടത്തുനിന്ന് യഹോവയായ ദൈവം അബ്രാഹാമിനെ പുറത്തുകൊണ്ടുവന്നു (യോശു. 24:2,3).
        ഒരിക്കൽ കനാൻദേശം ഒറ്റുനോക്കുവാൻ യോശുവ അയച്ച രണ്ടുപേർ അവിടെചെന്ന് രാഹാബ് എന്ന സ്ത്രീയുടെ വീട്ടിൽ പാർക്കുക ഉണ്ടായി. അവർ അവിടെ ഉണ്ട് എന്ന രഹസ്യവിവരം കിട്ടയതിൻ്റെ അടിസ്ഥാനത്തിൽ യെരീഹോരാജാവിൻ്റെ ആളുകൾവന്ന് ആ വീട് വളയുകയും ദേശം ഒറ്റുനോക്കുവാൻ വന്നവരെ പിടിക്കുവാൻ ശ്രമിക്കുകയും ചെയ്തു. എന്നാൽ രാഹാബിൻ്റെ ബുദ്ധിപരമായ നീക്കത്താൽ അവർ അവിടെനിന്ന് രക്ഷപ്പെടുകയും, പിന്നീട് രാഹാബ് തങ്ങളെ രക്ഷിച്ച വസ്തുതകൾ അവർചെന്ന് യോശുവയെയും കൂട്ടരെയും അറിയിക്കുകയും ചെയ്തു. യിസ്രായേലിൻ്റെ ദൈവത്തെക്കുറിച്ച് കേട്ടറിയുകയും, ആ ദൈവത്തിൻ്റെ ശക്തിയിലും സാമർത്ഥ്യത്തിലും വിശ്വസിക്കുകയും, ആ ദൈവത്തിൻ്റെ മക്കളെ മരണത്തിനുവിട്ടുകൊടുക്കാതെ ജീവൻ രക്ഷിക്കുകയും ചെയ്ത രാഹാബ് ദൈവത്തിന് പ്രിയയായി മാറി. പിന്നീട് യെരീഹോമതിൽ തകർത്ത് കനാൻ ദേശത്തേക്ക് പ്രവേശിച്ച യിസ്രായേൽ ജനം അവിടയുള്ളവരെ സംഹരിച്ചപ്പോൾ, രാഹാബിനെയും അവളുടെ അപ്പനെയും അമ്മയെയും സഹോദരന്മാരേയും അവൾക്കുള്ള സകലത്തെയും പുറത്തുകൊണ്ടുവന്നു (യോശുവ 6:22,23).
   

       നമ്മുടെ കർത്താവായ യേശുക്രിസ്തുവിൻ്റെ സ്വർഗ്ഗാരോഹണത്തിനുശേഷം അവിടുത്തെ ശിഷ്യന്മാരിൽക്കൂടെ വലിയ അത്ഭുതങ്ങളും അടയാളങ്ങളും നടന്നുകൊണ്ടിരുന്നു. അപ്പൊസ്തലനായ പത്രൊസ് കടന്നുപോകുമ്പോൾ അവൻ്റെ നിഴൽ എങ്കിലും വല്ലവരുടെയും മേൽ വീഴേണ്ടതിന് രോഗികളെ പുറത്തുകൊണ്ടുവന്ന് വീഥികളിൽ വിരിപ്പിന്മേലും കിടക്കമേലും കിടത്തുകയും അവർ സൗഖ്യമാകുകയും ചെയ്തുകൊണ്ടിരുന്നു (അപ്പൊ. പ്രവ. 5:15).

        ഇനിയും നിരവധി ഉദാഹരണങ്ങൾ വേദപുസ്തകത്തിൽനിന്ന് അക്കമിട്ടെഴുതുവാൻ കഴിയും, അന്യദൈവങ്ങളെ സേവിച്ചുകൊണ്ടിരുന്നവരെ, പാപത്തിൻ്റെ ചെളിക്കുഴിയിൽ കിടന്നവരെ, സമൂഹത്തിൽ വെറുക്കപ്പെട്ട് ജീവിച്ചിരുന്നവരെ, രോഗപീഢകളാൽ ഇരുളറകളിൽ കിടന്നവരെ കർത്താവ് കരംപിടിച്ച് പുറത്തുകൊണ്ടുവന്നു. അവരെ രക്ഷിച്ചു, അവരെ മാനിച്ചു, അവരെ സൗഖ്യമാക്കി, അവർക്ക് വാഗ്ദത്തങ്ങൾ നൽകി അവരെ ദൈവപദ്ധതയുടെ ഭാഗമാക്കി.
       ആ ദൈവപ്രവൃത്തികൾ ഇന്നും വെളിപ്പെട്ടുകൊണ്ടിരിക്കുന്നു. വിശ്വസിക്കുന്നവരെയും തങ്കൽ ആശ്രയിക്കുന്നവരെയും കർത്താവ് സന്ദർശിക്കുകയും അവരുടെ അവസ്ഥകളിൽനിന്ന് കരംപിടിച്ച്പുറത്തുകൊണ്ടുവരികയും ചെയ്യുന്നു. എന്നിട്ട്;
യോഹ. 10:4 “ *തനിക്കുള്ളവയെ ഒക്കെയും പുറത്തുകൊണ്ടു പോയശേഷം അവൻ അവെക്കു മുമ്പായി നടക്കുന്നു;* ..” സ്തോത്രം !
*അവൻ നമ്മെ വിശ്വസ്തതയോടെ നടത്തും*.
വിശ്വസിക്കുന്നവർക്ക് ആമേൻ പറഞ്ഞുകൊണ്ട് ഈ വാഗ്ദത്ത സന്ദേശം ഏറ്റെടുക്കാം.
പ്രാർത്ഥനയോടെ,
ഷൈജു പാസറ്റർ (9424400654)
വചനമാരി ഭോപ്പാൽ