രണ്ടു വാക്യങ്ങൾ നമുക്കു വായിക്കാം;
1 ശമുവേൽ 11:6 “ശൌൽ വർത്തമാനം കേട്ടപ്പോൾ ദൈവത്തിൻ്റെ ആത്മാവു അവൻ്റെമേൽ ശക്തിയോടെ വന്നു;”
യിരെ. 50:43 “ബാബേൽരാജാവു അവരുടെ വർത്തമാനം കേട്ടിട്ടു അവൻ്റെ ധൈര്യം ക്ഷയിച്ചുപോയി;”
വർത്തമാനം കേട്ടപ്പോൾ രണ്ടു രാജാക്കന്മാർക്ക് ഉണ്ടായ രണ്ട് അനുഭവങ്ങളാണ് ഈ തിരുവചന വാക്യങ്ങളിൽ നമ്മൾ കാണുന്നത്. അവർ കേട്ട വർത്തമാനങ്ങൾ അവരെ ഭയപ്പെടുത്തുന്നവയും അവരെ തകർത്തു കളയുമെന്നുള്ളതുമായിരുന്നു. ആ വർത്തമാനങ്ങളോട് അവർ പ്രതികരിച്ച വ്യത്യസ്ത രീതിയാണ് നമ്മൾ ശ്രദ്ധിക്കേണ്ടത്.
*ഒന്നാമതായി*, ശൌൽ കേട്ട വർത്തമാനത്തിൻ്റെ സാരം, അമ്മോന്യനായ നാഹാശ് രാജാവ് തൻ്റെ ബഹുസൈന്യവുമായി വന്ന് യിസ്രായേൽ ജനത്തെ തോൽപ്പിച്ച് അവരുടെ വലങ്കണ്ണൊക്കെയും ചുഴന്നെടുക്കും എന്നുള്ളതായിരുന്നു. അമ്മോന്യസൈന്യത്തിൻ്റെ കരുത്തും ആൾ ബലവും അറിയാവുന്നവർ ആ വർത്തമാനം കേട്ടാൽ നിശ്ചയമായും ഞെട്ടിവിറെക്കേണ്ടതാണ്, എന്നാൽ ശൌൽ ആ വർത്തമാനംകേട്ട് ഭയന്ന് വിറെക്കുകയല്ല ചെയ്തത്, അവൻ ദൈവാത്മാവിനാൽ ശക്തിപ്പെട്ടു.
*രണ്ടാമതായി* കാണുന്നത് ബാബേൽരാജാവിൻ്റെ കാര്യമാണ്. ദൈവത്തിനും ദൈവജനത്തിനും ദോഷം ചെയ്ത ബാബേലിന് വിരോധമായി ദൈവം ജാതികളെയും രാജാക്കന്മാരെയും വരുത്തുമെന്നും ക്രൂരന്മാരും കരുണയില്ലാത്തവരുമായ അവർ ബാബേലിനുനേരെ അണിനിരക്കും എന്നും കേട്ടപ്പോൾ ബാബേൽരാജാവിൻ്റെ ധൈര്യമെല്ലാം ക്ഷയിച്ചുപോയി, അവന് അതിവ്യസനവും വേദനയും പിടിച്ചു എന്നാണ് വേദപുസ്തകത്തിൽ രേഖപ്പെടുത്തിയിരിക്കുന്നത്.
ഇതാണ് ദൈവമക്കളും ലോകമനുഷ്യരും തമ്മിലുള്ള വ്യത്യാസം. ഈ ലോക ജീവിതത്തിൽ രണ്ടുകൂട്ടർക്കും പരീക്ഷകളും പോരാട്ടങ്ങളും ഉണ്ട്. ഭയപ്പെടുത്തുന്ന വിഷയങ്ങൾ ജീവിതത്തിന് വിരോധമായിട്ട് എഴുന്നേറ്റുവരുന്ന അനുഭവങ്ങൾ ഉണ്ടാകും. തകർത്തുകളയും നശിപ്പിക്കും ഇല്ലാതാക്കും മുതലായ വെല്ലുവിളികളുമായി പല ശത്രുക്കളും നമുക്ക് എതിരെ വരാം. ചില വർത്തമാനങ്ങൾ നമ്മെ വല്ലാതെ ഭയപ്പെടുത്തുവാൻ തക്കതായവയുമായിരിക്കാം. എന്നാൽ ആത്മാഭിഷേകം പ്രാപിച്ച ദൈവപൈതൽ ആ വെല്ലുവിളികൾക്കും വർത്തമാനങ്ങൾക്കും നടുവിൽ ഭയക്കുകയല്ല ചെയ്യുന്നത്, അവർ അഭിഷേകത്തിൽ നിറഞ്ഞ് കൂടുതൽ ബലവും ശക്തിയും പ്രാപിക്കും. സ്തോത്രം !
വർത്തമാനങ്ങൾകേട്ട് ചില വ്യക്തികൾ ചെയ്ത കാര്യങ്ങൾ തിരുവചനത്തിൽ രേഖപ്പെടുത്തിയിരിക്കുന്നവയിൽ ചിലത് നമുക്ക് ഓർക്കാം;
നെഹെ. 1:4 “ഈ വർത്തമാനം കേട്ടപ്പോൾ ഞാൻ ഇരുന്നു കരഞ്ഞു; കുറെനാൾ ദു:ഖിച്ചും ഉപവസിച്ചുംകൊണ്ടു സ്വർഗ്ഗത്തിലെ ദൈവത്തോടു ഞാൻ പ്രാർത്ഥിച്ചു..”
എസ്ര. 9:3 “ഈ വർത്തമാനം കേട്ടപ്പോൾ ഞാൻ എൻ്റെ വസ്ത്രവും മേലങ്കിയും കീറി എൻ്റെ തലയിലും താടിയിലുമുള്ള രോമം വലിച്ചു പറിച്ചു സ്തംഭിച്ചു കുത്തിയിരുന്നു..സന്ധ്യായാഗത്തിൻ്റെ സമയത്തു ഞാൻ എൻ്റെ ആത്മതപനം വിട്ടു എഴുന്നേറ്റു കീറിയ വസ്ത്രത്തോടും മേലങ്കിയോടും കൂടെ മുട്ടുകുത്തി എൻ്റെ ദൈവമായ യഹോവയിങ്കലേക്കു കൈ മലർത്തി..”
മർക്കൊ. 5:27 “..ഒരു സ്ത്രീ യേശുവിൻ്റെ വർത്തമാനം കേട്ടു: അവൻ്റെ വസ്ത്രം എങ്കിലും തൊട്ടാൽ ഞാൻ രക്ഷപ്പെടും എന്നു പറഞ്ഞു പുരുഷാരത്തിൽകൂടി പുറകിൽ വന്നു അവൻ്റെ വസ്ത്രം തൊട്ടു. ക്ഷണത്തിൽ അവളുടെ രക്തസ്രവം നിന്നു; ബാധ മാറി..”
………….
അവർ കേട്ട വർത്തമാനങ്ങൾ അവർക്ക് കൂടുതൽ ശക്തിനൽകി, അവരെ കൂടുതൽ കർത്താവിങ്കലേക്ക് അടുപ്പിച്ചു, സൌഖ്യവും വിടുതലും നേടിക്കൊടുത്തു.
ഒരിക്കൽക്കൂടെ എൻ്റെ വാക്കുകൾ ഞാൻ ആവർത്തിക്കട്ടെ; ഇന്ന് നമ്മൾ കേൾക്കുന്ന ചില വർത്തമാനങ്ങൾ കേട്ട് നമ്മൾ പേടിക്കേണ്ടതില്ല. ആ വർത്തമാനങ്ങൾ ചിലപ്പോൾ ലോകമനുഷ്യരെ തകർക്കുന്നവയായിരിക്കാം, പക്ഷേ, നമ്മെ കൂടുതൽ ബലപ്പെടുത്തുന്നതിനും അനുഗ്രഹിക്കേണ്ടതിനും വേണ്ടിയുള്ളതാണ്. വിശ്വസിക്കുന്നവർക്ക് *ആമേൻ* പറയാം.
ഒരു നല്ലമാസം ആശംസിച്ചുകൊണ്ട്,
പ്രാർത്ഥനയോടെ,
ഷൈജു പാസ്റ്റർ (മൊ. 9424400654)
വചനമാരി ടീം. ഭോപ്പാൽ
പ്രാർത്ഥനാ വിഷയങ്ങൾ അറിയിക്കേണ്ടതിന്നു വിളിക്കേണ്ട നമ്പർ: 9589741414, 7000477047, 07554297672, 7898211849
ഈ ധ്യാന സന്ദേശം ദയവായി മറ്റുള്ളവർക്കും അയച്ചുകൊടുക്കുക.
